Sos giornales de oe #046

Fùbalu e bilàntzios, ospidales e bassas, mirende a sas regionales dae Casteddu e S’Alighera
7 Làmpadas 2023
sos giornales de oe

Duas sunt sas noas chi seberamus oe de bos torrare in sardu a pustis de sa letura de sos giornales essidos in edìcola. Ambas duas pertocant sas regionales imbenientes: sa prima est a costàgiu de su disafiu de su Cagliari (s’iscuadra de fùbalu de Casteddu); se segunda movet dae s’Alighera. Comintzemus.

L’Unione sarda non si lìmitat a faeddare de s’isetu mannu pro sa sorte de sos 11 de Ranieri. In cussa pàgina bi ponet fintzas sa gherra intre Giunta regionale e opositzione pro sa chistione istàdiu a pustis de s’acòrdiu de programma intre Ras e Comune. Un’acòrdiu chi non faeddat de istàdiu ebbia ma fintzas de un’ospidale, de unu polu nou de ufìtzios, de unu campus universitàriu de acumprire e de àteras istruturas pro potentziare sos servìtzios universitàrios. «Sa Regione – at naradu su progressista Francesco Agus – at vinculadu su Comune a sutascrìere un’acòrdiu in ue b’at de totu, fintzas un’ospidale chi nemos ischit in ue l’ant a fàghere». Deretu sa rèplica de s’assessore Doria e de su cabu de grupu Fdi Piga chi, a boghe sola atacant su tzentru-manca. Cosa chi mustrat sa paghe intre custas duas cambas de su tzentru-dereta sende chi finas a pagas dies a como b'aiat ruìngiu intre su sìndigu Truzzu e sa Regione pro su dinare de custa e su mudìmene de Solinas.

La Nuova Sardegna imbetzes nos contat chi duos consigeris aligheresos de s’Udc «ant assentadu duos corfos a tipu Karate Kid marcande ausèntzia in sa setziada chi lunis deviat aprovare su bilàntziu de previsione chi, in casu de botzadura, diat batire su cummissàriu a tzitade sessende su Consìgiu in antis de s’ora». Conoci, su sìndigu, est sardista. E pagas dies a como s’est atacadu cun sa polìtica regionale narende de èssere a favore de sa privatizatzione de sos aeroportos (cun risposta de s’assessore sardista Moro cussigende·li de pensare a sas bassas tzitadinas). Ite narat s’Udc? Chi Conoci non pigat in cunsideru sas propostas issoro. Duncas sas chistiones amministrativas non sunt finidas cun sas eletziones de Assèmini e de Igrèsias ma sighint e semper prus ligadas a sas regionales imbenientes parent.

© RIPRODUZIONE RISERVATA