In Marmidda su primu ristorante sardu in cantina

Aprofundimentu de su chenàbura - In Marmidda arribbat Arieddas, unu progetu de enoturismu nou: su primu ristorante sardu in cantina chi aberit sa ghenna sua in intro de sa cantina de Seddori Su 'entu.

A contare a ANSA su progetu est Domenico Sanna, su responsàbile de sas relatas pùblicas de s'azienda vinicola seddoresa. Gosi Sanna acrarat s'issèberu de Arieddas comente nùmene de su ristorante: su nùmene, ammentat sos bentos chi sulant in su cabu chi acasàgiat s'azienda agrìcula ghiada dae Valeria, Roberta e Nicola Pilloni, est a nàrrere dae sos fìgios de Salvatore Pilloni, su fundadore de s'azienda.

Su chi at a propònnere su ristorante Arieddas est unu menu a bator manos. Sa cosa est fìgia de su resurtu de sa consulèntzia de su “chef” romagnolu Pier Giorgio Parini, in su tempus coladu isteddu Michelin, e de su contributu de Francesco Vitale, “chef “de su ristorante. Tra sas propostas, una retzeta chi afestat s'istiu e chi at comente protagonista un'ingrediente chi est tra sos produtos mègius de Samassi: su foràstigu a fitas cotu arrostu.
No est totu, pro ite su menu de Arieddas proponet finas su gelau de lati de cabra coloradu dae su ruju de sa cariasa e una fantasia de frùtora cun bàngia de afràbica. Totus propostas friscas, chi ant su nuscu e su sabore de s'istiu. Propostas chi si tastant e si alenant in su sartu marmiddesu.

Nuscos e sabores, duncas, fìgios de sos produtos sìmbolu de custu territòriu. Produtos chi sunt traballados dae sas manos espertas de sos duos “chef” e chi nos donant unu biàgiu de gustu istravanadu.
 

Naradu a istrintu, su chi proponet  Arieddas est unu mandigare simple ma màstrinu, unu mandigare fine, chi punnat massimamente a eliminare sos isperdissios.

Unu menu, su de Arieddas, chi, manera rigorosa, dat importu mannu a sa birdura, a s'ortalìssia, a sos legùmenes e a sa frùtora de su territòriu. Gosi onni tastu est un'esperièntzia ùnica, unu biàgiu licantzu in sos nuscos e in sos sabores de Marmidda. Onni biàgiu est arrichidu dae sos binos de sa cantina Su 'entu, binos, s'ischit, chi dant valore mannu a su territòriu.