Rèdditu, Sardegna chiama Sardegna contra a Guvernu e Regione
![scs2trìulas](/sites/default/files/styles/header_md/public/upload/2023/07/scs2tr%C3%ACulas.jpg?h=feadb981&itok=mmT6903v)
«Su guvernu, cun unu messàgiu, at abbandonadu mìgias de famìlias chi, como, ant a dèvere “isetare su contivìgiu eventuale” dae parte de sos servìtzios sotziales locales giai impirigados». Est su chi narant Danilo Lampis e Nicoletta Pucci, boghes de Sardegna chiama Sardegna, annanghende chi «est malu a bajulare su mudìmene de su guvernu regionale nostru, in cara de custa sutratzione noa de resursas, mescamente como chi est creschende sa povertade relativa chi, cunforma a sa Caritas, interessat belle 110mìgia famìlias sardas». Lampis e Pucci torrant a sos 5 puntos propostos a su tzentru manca narende chi «bi cherent polìticas chi favoressant su fràigu de autonomias sotziales, de traballu e culturales pro nche colare sas formas de agiudu de como, de màdrighe assistentziale, in favore de una forma de rèdditu mìnimu universale, inclusivu e ativante cunforma a sos inditos de su Consìgiu e de su Parlamentu de s’Unione Europea».