In Tàtari si nche pesant sas “Oghes contra a sa gherra”

S'8 de su mese de cabudanni in Tàtari si nche pesant sas "oghes contra a sa gherra", una manifestatzione politicu-culturale promotzionada dae s'assòtziu Domo de Totus, dae su "Fronte della Gioventù Comunista" e dae su "Movimento Associativo degli Studenti". S'apuntamentu est pro sas 17.00 in sa pratza de sa Comuna.

Una chenàbura de boghes aunidas dae sa matessi filu ruju: su refudu de sa gherra comente risolutzione de sas brigas internatzionales. Ma no est acabada inoghe, pro ite "Oghes contra a sa gherra" est peri sa denùntzia de sa militaritzatzione de sa Sardigna chi  - pretzisat sa nota firmada dae s'assòtziu tataresu Domo de Totus - " comente s'ischit acasàgiat sos tres polìgonos militares prus importantes d'Europa e su 64% de sa tzerachias militares de s'Istadu italianu".

In prus de sas arresonadas polìticas, "Oghes contra a sa gherra" at a acasagiare mùsica, leturas, reading teatrales e presentatziones de òperas artìsticas. Tra sos nùmenes presentes su de Bakis Beks, su de s'iscritore Filippo Kalomenidis e sos de sos pintores  Riccardo Camboni e Pastorello. Non est totu, b'ant a èssere finas su colletivu literàriu "Clip", su "Poetry Slam", sa cumpangia teatrale "Canta Cronache" e su "Comitato Stop RWM".

"Sa punna de custa manifestatzione - acrarat Fabrizio Cossu presidente de s'assòtziu Domo de Totus - est sa de aunire sas fortzas pro gherrare contra a sos costos sotziales e econòmicos impostos a sos sardos dae s'ocupatzione militare, carestia e bisestru ambientale".

"Oghes contra sa gherra" at giai otentu s'adesione de: "Emergency", "Rifondazione Comunista", de su comitadu  "Fermiamo la guerra!- Sassari", de A Foras, de "Potere al Popolo", de "Cobas Scuola Sardegna", de su partidu "Rossomori", de s'"Associazione Punta Giglio Libera", de "Gambia Society in Sardinia" e de  "Unione degli Universitari".