Galu abbas brutas in su tzentru dereta. S'ispacadura est fintzas italiana?

Semus giai a sa de deghe dies de ghennàrgiu e su tempus est currende conca a sas iscadèntzias eletorales. Intro sas 8 de sero de su 15 tocat a presentare sos sìmbulos eletorales; intro sas 8 de su 22 cheret chi imbetzes presentent sas listas; dae sas 8 a mesudie de su 25 tocat in fines a presentare sos nùmenes de sos candidados a sa presidèntzia de sa Giunta regionale. Mancari custu tempus prus chi no astrintu sos giogos non sunt galu concruidos. In su tzentru dereta, pro nàrrere, sos sardistas e sa Lega sunt ancora cuntestende su sèberu de Truzzu. A bisu de s’assessore Moro ant trucadu sas règulas de sa mesa de sa coalitzione e, pro parte de Salvini, su vitze suo Crippa est narende chi cando l’aiant issos sa majoria relativa, non si sunt postos a pretèndere mudadas ma candidaduras in sas regiones cun su tzentru manca ebbia. In ue nch’at a fèrrere Solinas si sas cosas abarrant gasi?

Una cursa a banda giai l’at annuntziada Alessandra Zedda. E pro Solinas b’at chie est previdende (o bisende·si·lu ebbia) unu tandem cun Soru. Non diat pàrrere una cosa possìbile, fintzas ca - lassende·nche a banda su caos eventuale in sa coalitzione sarda - de custa manera amus a bìdere finamentas non un'autonomizatzione de su Psd'az dae su Carroccio, ma fintzas cunsighèntzias in Itàlia.

m.p.