Sa Lega non lassat solu a Solinas. «Perunu passu a dae in segus»

«Perunu passu a dae in segus». Sa Lega non nde cheret s’intesa de una ghia de coalitzione diferente dae s’uscente. Sighit duncas sa cuntierra in intro de s’alleàntzia de tzentru dereta a pustis de su sèberu de su sìndigu de Casteddu comente candidadu a sa presidèntzia de sa Regione.

Sos de Salvini, chi in su mentres – nessi pro como – at annuntziadu de non si chèrrere candidare a sas europeas, non cherent chi siat Paolo Truzzu de Fratelli d’Italia sa figura primàrgia de s’iscuarda chi a su presente est guvernende s’ìsula.

Ma sa partida no est sarda ebbia. Amus a bìdere in custas dies comente l’ant a cumpònnere finamentas cunforma a sas àteras eletziones regionales a pustis de sas nostras.

m.p.