Sos Moratti andende·si·nche. Sa Saras mai espropiada

Peristantu chi mancat una proposta polìtica sotzialista pro chi s’energia siat pùblica e controllada dae traballadores e comunidades, s’àtera nova de oe, in prus de sos rodabbentos nugoresos, est chi sos Moratti si nch’andant lassende sa Saras a sos olandesos de Vitol. Sa famìlia de sos presidentes de s’Inter tzedet su 35% de su capitale atzionàriu a su preju de 1,75 èuros a atzione. Duncas su balàngiu b’est. Chie bi perdet semus semper nois. Nois chi amus disinnadu de pèrdere sena mai àere avantzadu una proposta polìtica de controllu pùblicu de sos impiantos e de sa produtzione. Sa normativa italiana faeddat de natzionalizatzione cun indennizu, ma est craru chi a faeddare de indennizos cheret nàrrere a faeddare de indennizu pro nois e pro s’ambiente nostru. Ite agiudu diat pòdere dare una Saras sarda e pùblica pro sa programmatzione energètica de s’artìculu in antis? Custu dìamus chèrrere intèndere.