Otieri archìviat sa de 65 editziones de su Prèmiu suo

Otieri archìviat sa de sessantaghimbe editziones de su Prèmiu omònimu de literadura sarda cun una grandu tzerimònia de premiatzione de sos autores. Sa manifestatzione de sàbadu su 23 de santandria, presentada dae Piersandro Pillonca in su teatru tzìvicu “Oriana Fallaci”, l’amus a ammentare comente un’ispetàculu de sa cultura cuntemporànea sarda cun versos, contos, càntigos e medas òspites ispetziales.

Introduida dae unu càntigu maestosu de su Coro Ilune de Durgale e dae Clara Farina chi at resadu “Non si poni resistì” tzelebrende su de 300 anniversàrios de sa nàschida de su “Catullu gadduresu”, sa serada nos at fatu a bìdere sa vitalidade de unu cuncursu chi dae su 1956 est su puntu de riferimentu printzipale de s’iscritura literària in limbas de Sardigna.

Momentos artos de emotzione los amus bidos cando Giannalisa Murgia est artziada a parcu pro resare su bator trobojadu iscritu dae su babbu Sarvadore, su binchidore de sa setzione “Tra poesia e càntigu” dedicada a Antoni Cubeddu. Su poeta macumeresu, cun sa poesia sua in risposta “A s’amigu Bannantoni Busio”, aiat otènnidu sos cunsensos de sa giuria ghiada dae Dino Manca pròpiu cando chi arriveit sa nova de sa morte sua, su mese de austu.

E a Murgia est pròpiu Manca chi l’at ammentadu in sa relatzione sua. Su dotzente de Filologia in Tàtari at propostu a sos presentes unu biàgiu in ue s’aedu de Pubusone (custu su nùmene de su sartu suo) essit a campu che a su chi at «cantadu e traduidu in poesia, sublimende·la, un’esistèntzia marcada dae su sacrifìtziu e dae sa fadiga rude, est s’esèmpiu paradigmàticu de su chi at chertu nàrrere sa poesia pro medas sardos e de su chi su Prèmiu Otieri at acraradu cun custos poetas».

In sos podios finamentas Domenico Battaglia, Giuseppe Tirotto e Giancarlo Secci pro sos contos, Dante Erriu e Andrea Columbano in sa matessi setzione de Murgia e sos tres de sa setzione poesia Luca Meledina, Jubanne Piga e Antonello Isoni.

In intro de sa manifestatzione, che est possìbile a la bìdere dae su canale Youtube de su Prèmiu, si sunt esibidas prus bortas sas giai mentovadas fèminas de su Coru Ilune dirìgidu dae su maistru Alessandro Catte. Su cumplessu vocale at conchistadu su “Trofeu de s’arte” ofertu dae sa Provìntzia de Tàtari e assignadu a personalidades o grupos chi si sunt distintos amparende o annoende sa traditzione artìstica isulana.

Cuntentos mannos sos giurados Anna Cristina Serra, Cristiano Becciu, Duilio Caocci, Clara Farina, Attilio Mastino, Riccardo Mura, Giambernardo Piroddi, Simone Pisano, Gabriele Tanda, Salvatore Tola. Como sa mirada est a sa de sessantases editziones.