Limba, su 9 sa Cunferèntzia aberta in Casteddu

Apuntamentu nou pro chistionare de su benidore de sa limba sarda. Su 9 de nadale, a sas 10.30 in sa sala Lilliu de sa Biblioteca regionale (arburada de Trieste 137 in Casteddu), b’est sa Cunferèntzia Aberta de su sardu, de su catalanu de s’Alighera, de su tataresu, de su gadduresu e de su tabarchinu. Ocannu su tema pertocat – narat s’assessora Ilaria Portas – «su Pianu nou de Polìtica Linguìstica de 5 annos, 2025-2029, pro dessinire is prioridades e is punnas generales, is resurtados isbetados e is elementos chi serbint pro avalorare sa polìtica linguìstica regionale». Duas sas partes de sa cunferèntzia. A banda de mangianu, «s’ant a acrarare is fainas e is atividades prus de importu fatas cun su PPL betzu cun interventos a subra de s’iscola, is isportellos linguìsticos e is mass media a incuru de su Servìtziu limba e cultura sarda e subra is certificatziones linguìsticas cun is interventos de is referentes de is duas Universidades sardas». A borta de die, dae sas 15 «s’ant a iscumproare is resurtados de sa chirca sotziulinguìstica noa a pitzu de sa pitzinnia sarda fata dae s’Universidade de Casteddu, de su ruolu de s’Isportellu Linguìsticu Regionale e de su contributu de chie at a leare parte a sa dibata de serrada». Sa cunferèntzia podet èssere sighida fintzas in lìnia culleghende·si a https://regsardegna.webex.com/