Rèpublica contra a su Ddl àreas idòneas: «No est sa Regione a detare sas règulas»

«Custu disegnu de lege, contadu comente avanguàrdia a livellu italianu, est privu de su totu de sovranidade polìtica , de gestione pùblica in s’interessu colletivu, de legitimatzione populare». Gasi est chi s’espressant sos de Repùblica in riferimentu a su chi su Cussìgiu at votadu pagas dies a como in contu de “àreas idòneas”. Su proite? «Ca, mancari lu chèrgiant fàghere crèere, non cuntestat su lìmite mìnimu de de sos 6,5 Gigawatt de produtzione energètica chi s’Istadu italianu nos at impostu: est a nàrrere sa vera chistione coloniale de s’affaire energia». A bisu de sos indipendentistas, «No est sa Regione a detare sas règulas; su pianu energèticu nostru diat dèvere regulamentare sa produtzione individuende sas àreas idòneas pro s’installatzione de impiantos chi produint energia a benefìtziu de sa Sardigna e, mescamente, istabilende unu lìmite màssimu de produtzione».