Sos giornales de oe #039

Bonas dies! E pregontemus·nos. Cantu l’amus posta in contu sa derrota de sa Sardigna pro su chi pertocat s’Einstein telescope? Oe sos giornales sardos aberint cun sa presidente de su Consìgiu Gioegia Meloni chi lu «beneighet» (L’Unione sarda) e chi bi ponet «su timbru» (La Nuova Sardegna). Ma pro rispòndere a sa dimanda a comintzu cheret chi torremus agigu a dae in segus cun su tempus pro nos ammentare unas cantas derrotas tipu Cagliari capitale europea della Cultura, Cagliari capitale verde europea, Nuoro capitale italiana della cultura. Sa possibilidade chi sa Sardigna lompat segunda ebbia a pustis de su Limburgo (si non sa de tres, ca a sa gara b’at a pòdere pigare parte finamentas una localidade de sa Sassònia) est prus chi non reale. Amus in pessu lèghidu – e invitamus a lèghere pro s’iscumprou cun su chi semus iscriende inoghe – su chi ambos giornale ant istèrridu a pàgina 15 (L’Unione) e 3 (La Nuova). Sintetizende·la, sos puntos a favore de s’Et in Olanda sunt custos: sos capitales postos a cùrrere, sa campagna publitzitària aprontada, sa rete de impresas tecnològicas ispetzializadas, de servìtzios e de iscolas, universidades e tzentros culturales e ricreativos a inghìriu de su situ, sos collegamentos, s’interessu cumbinadu de Paisos bassos, Bèlgiu e Germània etc. A favore de Lùvula ite b’at? Sa mancàntzia de sismitzidade, atividades industriales belle inesistentes, s’elementu demogràficu chi est imprentadu in sos giornales si non cada die in cue nche semus. Miremus a custos elementos. Ca in primis semus a tretu de cumprèndere chi sos fatores chi ant a determinare su sèberu sunt polìticos. E a pustis ca una derrota de Lùvula at a abèrrere sa ghenna a àteros sèberos polìticos. S’eòlicu in cussos tretos, a su presente limitadu dae custa prospetiva, diat torrare cun totu sa prepotèntzia sua gasi comente est sa prassi in su restu de s’ìsula; sas mancàntzia de sismitzidade diat pòdere èssere sa còntiga pro su depòsitu de resùgios radioativos; sa denatalidade e s’ispopulamentu ant a tzertificare s’obtorto collo pro sa semper prus inevitàbile colònia turìstica e tecnològicu-militare. A s’imbesse de sa “isola possibile” cantada dae Piero Marras. Serrende·la (in pare cun sa de sa derrota) s’idea chi siant punnende a s’Et cun sas allegas fartosas, posta in contu l’amus?