Scàrrigu a celu obertu in Sant'Elia. Claudia Zuncheddu (Rossomori): "Est a arriscu sa saludi de is cittadinus"

(IlMinuto) – Casteddu, 29 de su mes''e cabudanni - Televisoris, lavatricis e gommas. Sachitus de plastica, telus de nailu e resídius de materiali edili. Latinas, siringas usadas, ischeletrus de soffas e de cadiras. De una pariga de annus s'arruga tra is asilus e su Museu de su " Lazzaretto" - in su cuarteri de Sant'Elia, in Casteddu - tenit unu scàrrigu a celu obertu, fonti de arriscu po sa saludi de is cittadinus. Ddu dinùnziat cun d'una interrogazioni sa consillera comunali de is Rossomori Claudia Zuncheddu. "Custa situazioni de damnu a s'ambienti - precisat s'esponenti sardista de sinistra - no est scéti un'ispettaculu chi no tenit dignidadi, ma est puru massima fonti de arriscu po sa saludi de is cittadinus". Zuncheddu dimandat a su síndigu, Emilio Floris, e a is assessoris de su ramu "si tentint intenzioni de fai, o si apint giai fattu calicosa po ndi tirai sa porcheria e po bonificai custus logus, e dimandat puru cali siant is modus po fai custas operazionis".