Partit sa "Federazione della Sinistra". Ferrero a Casteddu: "Campagnia refirendaria po abboliri sa lei 30"

(IlMinuto) – Casteddu, 14 de su mes''e paschixèdda - "Oi, a 40 annus de prazza Fontana, podeus nai chi ant bintu cussus chi ant fattu is digóglius in Italia e s'agataus a facc''e unu presidenti chi no sciu definiri in ateru modu si no fascista". Cun custus fueddus su segretariu de  su "Partito della Rifondazione comunista" Paolo Ferrero, in Casteddu su 12 de su mes''e paschixèdda in su "Dopolavoro Ferroviario" po s'assembrea chi at fattu nasci sa "Federazione della Sinistra" in Sardigna, at arregordau is cuatru decennius de su degógliu de Milanu. S'assembrea regionali - promòvia de su Prc, de su Pdci, de Socialismo 2000 e de Lavoro e Società - at obertu is portas a numerosas partis de sa sinistra de is movimentus e de is sindacaus. Tra is aterus ant pigau su fueddu - is rappresentantis de sa "Federazione" - e puru is esponentis de su "Comitato precari Scuola Cagliari", de su "Comitato Gettiamo le Basi", de sa "Cia", de s'"Associazione Sardegna-Palestina", de s'Rdb Cub, de is Cobas, de sa "Rete 28 aprile" e de "Casa Gramsci". Acanta a sa cuntentesa manna po s'aviada de su sugetu politicu nou no funt mancaus is azentus críticus o autocríticus: "Dda depeus acabbai - at nau Ferrero - de penzai ca is elezionis funt s'ùnica cosa importanti de sa politica, depeus fai una "Federazione" chi siat de sa parti de is traballantis. De gennàrgiu eus a donai su via a una campagna refenderaia po abboliri sa lei 30". "Teneus sa nezzessidadi de fai una forza de sinistra chi no si bregungit de sa farci e marteddu - at nau Fawzi Ismail de "Sardegna-Palestina" - ma in su passau nostru eus fattu erroris meda mannus: eus aprovau e votau is missionis de gherra". At iscerau is erroris de su passau puru Antonello Tiddia de sa "Rete 28 aprile". "No si seus agataus ca de 16 annus seus suttapostus a afracadas padronalis - at nau su "minatore rosso" - e ca sa lota a su precarariau andàt fatta primu. Candu teneus una chistioni chi si unidi arrennesceus perou a andai innantis totus impari, comenti po sa manifestazioni antirazzista de su 17 de su mes''e ledàminis. Si si bollint fai is cosas seriamenti tocat a portai innantis cussu chi si narat". "Est tempus ca is comunistas e i sozzialistas - at nau su consilleri regionali de su Pdci Radouan Ben Amara - spieghint a su mundu su própriu modu de biri is cosas: federausì".