Reza "Antirazzista": atóbiu de solidariedadi in Giorginu contra a s'isbarazzamentu de is treballantis senegalesus cumandau de Floris

(IlMinuto) - Casteddu, 10 de su mes''e fiàrgiu - Sa Reza"Antirazzista" casteddaia narat no a s'isbarazzamentu de s'Ex Edem de Giorginu - aundi de dexi annus est in afitu una comunidadi manna de senegalesus - cumandau ariseru cun d'unu decretu de su síndigu Emilio Floris. De custumerì a is 18.30 su movimentu at a donai duncas vida a un'atóbiu permanenti de solidariedadi po is traballantis chi bivint in s'edificiu. Sa Reza imbitat totu sa Sardigna "antirazzista" a participai a s'iniziativa. "Balsamo, su prefettu nou de Casteddu, su síndigu Floris, is responsabbilis de su consorziu industriali Cacip (ex Casic) - si podit liggiri in d'una nota - ant agatau in is impróddius "razziali" de Rosarno un'iscusa po imbentai un'apretu mannu chi no esistit e chi iat essi collegau a sa presénzia de is comunidadis foresteras in cittadi". "In nòmini de cust'apretu mannu chi no esistit - sighit sa nota - martis 9 de su mes''e fiàrgiu su síndigu Floris nd'at bogau unu decretu senz''e motivu po isbarazzai s'edificiu intru 48 oras, po arrexonis de saludi púbblica". "Est custu - narat su comunicau de sa Reza - un'edificiu chi tenit s'àcua, sa luxi, is bagnus chi funzionant, chi est stabili e no presentat perígulu de sciarrocus".
"Is mezus de comunicazioni - precisat sa nota - ant donau noas falsas, no ddu est nesciun'atera possibbilidadi po is 100 personas chi bivint in s'edificiu de Giorginu. Is serbízius sozialis, atressu sa Caritas, ant aprontau 3-4 domus de pigai in afitu e bastantis scéti po 15-20 personas (scéti cussas cun su permissu de "soggiorno" e cun sa residénzia in Giorginu). Po totus is aterus s'ùnica possibilidadi est s'istrada". "S'isbarazzamentu - finit sa nota - est una bera befa (...) e nosu bolleus e depeus lotai contra a custa befa".