Cuntestànt Zapatero: arrestaus in Roma tres indipendentistas bascus. Sa solidariedadi de aMpI e Unidadi/e

(IlMinuto) – Casteddu, 14 de su mes''e làmpadas - Cenàbara passau funti stetius arrestaus in Roma tres giòvanus militantis de sa sinistra indipendentista basca.
Furiant donendi bolantinus acanta de Palazu Chigi in ocasioni de sa bisita in Roma de su premier spagnolu Josè Luis Rodriguez Zapatero. Acusaus de fai parti de s'organizazioni indipendentista Segi, is tres funti stetius privaus de sa libbertadi acozendusì a unu mandau de arrestu firmau de s'autoridadi giudiziaria de Madrid in su mes''e paschixèdda passau.
Sa magistratura italiana at a depi decidiri - intru duas cidas - asuba de sa dimanda de parti de s'autoridadi spagnola de torrai a mandai is bascus in Spagna.
Is giòvanus militantis bascus ant arriciu sa solidariedadi de parti de is indipendentistas sadrus de A Manca pro s'Indipendentzia e de Unidadi/e de Sa Giuventudi/e Indipendentista Sarda.
"Cust'àteru fattu - scririt - Unidade - s'insertat in s'azioni spótica posta in atu de su stadu spagnolu in is cunfrontus de chini dógnia diri sighit a lotai po s'indipendénzia e su socialismu in Euskal Herria. Unu progetu spóticu chi bollit destruiri totugantu sa sinistra basca, tenendu comenti furriadroxu s'assuntu chi 'totu est Eta' e chi sighit a no arresparmiai nemmancu is organizazionis de is giòvanus, comenti cussa de is cumpàngius de Segi".
Pesant comenti coróngius is fueddus de s'imbasciadori de aMpI Cristiano Sabino. "Espressaus - narat Sabino - totali e assoluta solidariedadi in is cunfrontus de is tres cumpàngius bascus e denunciaus pubblicamenti s'agiudu spóticu e criminali de sa magistradura italiana in is cunfrontus de unu stadu comenti cussu spagnolu chi trumentat in modu meda malu is indipendentistas bascus e negat a su pópulu bascu su diritu a sa totali soverania".