Bellomonte (aMpI): "Tempus malus e senz''e luxi po su pópulu traballadori sadru"

(IlMinuto) - Casteddu, 6 de su mes''e argiòlas - "Giustízia Mala, no est scéti unu modu de nai tristu, ma est cun dolu mannu una realidadi meda légia. Si no fessat ca dda seu bivendi asuba e mimi 'e totu, forsis no ap'ai mai assimilau in prenu su sinnificau beru de custu díciu popolari. Oi cumprendu ca no est unu modu de nai, ma rapresentat sa cuscénzia de su distacu chi ddoi est tra chini amministrat 'sa justitzia' e sa bolontadi de sa genti, ammanniendi sèmpriri de prus sa distànzia tra is istituzionis e sa sociedadi civili". Est cantu scririt de su presoni de Sianu Bruno Bellomonte, s'indipendentista presoneri de aMpI, in d'una lítera mandada a Antonello Tiddia, su "minatore rosso" de sa Rsu Carbosulcis.
Aínturu de su presoni calabresu su militanti comunista e indipendentista analizat cun marigosori sa fasi política de oi.
"Po sa circustànzia economica - afirmat Bellomonte - is meris, primu fra totus Marchionne, sa Confindustria, su capitali cun sa própriu bestimenta imperialista (globalizazioni), cun sa scusa de sa crisi funt portendi un'acollada manna a is concuistas, diritus e interessus de sa classi operàja.
Sa Sardigna, cun d'una crisi de traballu senz''e torrada e cun sa serradura senz''e pàsiu de is fàbbricas at a depi passai a un'àteru e prus mannu isfrutamentu coloniali, po custu si previdint tempus meda malus e senz''e luxi po su pópulu traballadori sadru".