S'arràbiu de is pastoris in Monti di Mola: in migliaja manifestant a pagu metrus de sa domu de Berlusconi

(IlMinuto) – Casteddu, 27 de su mes''e austu - Sa protesta de is pastoris sardus arribbat acanta 'e su coru de s'imperu berlusconianu, Villa Certosa. Custu mangianu funti stetius pagu prus de 2.500 is allevadoris chi ant protestau in Portu Retundu, in Monti di Mola. Sa Sardigna bera est intrada in sa Sardigna "de pràstica". Sa protesta guidada de su 'Movimento pastori sardi' sighit duncas a ammanniai de cida in cida. Sa mobilitada de oi esti stetia cussa cun prus genti tra cussas chi, po totu su mes''e austu, ant atravessau s'Ísula de Meridioni a Tramuntana. Is pastoris sighint a denunciai su prétziu bàsciu de su lati: nemmancu 60 centésimus a su litru, una cifra chi no superat, ma abarrat asuta de meda a is costus de produtzioni. Is turistas de sa "Sardigna de pràstica" ant aghilliu cun spantu su corteu chi at atraversau su centru de sa bidda. Medas e medas is bandheras de is Cuatru Morus e de Mps.Sa manifestada esti stetia animada de is corus "Pastoris sardus, pastoris sardus" e "A foras a foras sa classi sfrutadora". De su stereu de una camioneta bessiant is fueddus de sa cantzoni "Ke a sos bascos ke a sos irlandesos": "Oh Sardigna custa est d’ora ke ti deppes iskidare e nos Sardos totu umpare si ki pesent in bon’ora". A sa Manifestada ant pigau parti puru unus cantu de militantis e dirigentis de is iscuadras indipendentistas de aMpI e de Sni. Passada de pagu sa mesadí unu grupu de manifestantis ant ocupau unu tretu de su portu. Sa mobilitada de custu cumpartu at tocau puru Casteddu. Custu mangianu Coldiretti at difatis aprontau una manifestada a fac''e su palatzu de sa Regioni in viale Trento.