"Contienda intradas". Cumpostu (Sni): "Unidadi de is sardus po difèndiri sa mudífica de su Statutu. Modificai pagamentas carburanti: 5 milliardus de eurus in giogu".

(IlMinuto) – Casteddu, 2 de su mes''e cabudanni - "S'aici nada 'Contienda intradas' tra Regioni Sardigna e Guvernu Italianu no est scéti unu cufrontu istitutzionali, ma unu cumbatimentu beru asuba 'e su pianu de sa soverania, tra una sociedadi, su pópulu sardu, e unu stadu chi no ddi reconoscit nemmancu su diritu a tenni is is próprias risorsas economicas". Est cantu narat cun d'una nota su cordinadori natzionali de Sardigna Natzione Indipendentzia Bustianu Cumpostu. Su leader indipendentista dimandat a is consilleris regionalis de arribbai a una positzioni única asuba de sa contienda.
"Sni - scririt Cumpostu - imbidat a totus is consilleris regionalis a agatai una positzioni única, chi puru pighendu indicu de sa proposta presentada de su centrusinistra, arribit a sa scridura de unu documentu únicu aundi s'acórdiu tengat prus pesu de is síngulus".

Un'unidadi chi Sni iat a bolli isterrit a totu su pópulu sardu. "Sni - narat su cordinadori - imbidat a totus is sardus e meda de prus a is indipendentistas a fai fronti únicu po difèndiri is ispatzius de soverania otentus cun sa mudífica de s'art. 8 de su Statutu e a mantènniri oberta sa contienda puru po sa mudífica  de s'art. 9 e otèniri s'autonomia in s'incasciu de is pagamentas e po su regulamentu de is accise".

"Scéti in sa produtzioni de is binzinas - calculat Cumpostu - su gétidu prus mannu de is accise iat a essi 5 milliardus de eurus a s'annu".