Pastoria. Zuncheddu (Rossomori) lassat is traballus de sa Commissioni Agricoltura: “Esclusioni grai de Mps”

(IlMinuto) – Casteddu, 1 de su mes''e cabudanni - "S'esclusioni de su 'Movimento dei Pastori Sardi' de sa Commissioni 'Agricoltura' est un'atu meda grai e po nudda democràticu". Est cantu narat su consilleri regionali de is Rossomori, Claudia Zunchenddu, chi ariseru at lassau is traballus de sa Commissioni comenti signu de protesta. Difatis a s'ascurtu furiant stetius imbidaus scéti is assótzius de categoria "istitutzionalis" de su cumpartu. "De mesis - precisat sa presidenti de is Rossomori - su 'Movimento dei Pastori Sardi' est impignau in d'una lota paxiosa de dinúntzia de sa drammàtica situatzioni chi corpit su cumpartu agro-pastorali in Sardigna. Custu Movimentu, senz''e partidus a is pabas, at interessau milli e prus de milli pastoris e at fattu in modu ca de custu dramma si ndi siat chistionau puru in is media italianus e internatzionalis". Sa protesta de is pastoris, narat Zuncheddu, no esti stetia pigada in cunsidériu scéti de sa Regioni Sardigna.

"Is únicus chi no si funt acataus de custu movimentu sèmpiri prus mannu - acrarat sa sardista de sinistra - funt su presidenti de sa Commissioni Mariano Contu e s'assessori a s''Agricoltura' Prato chi giai in is diris passadas traghillada is lotas paxiosas de Mps (...). Custu creat cumpartziduras aintru de su mundu agropastorali puru gratzias a calencuna proposta de organizatzionis sindacalis sèmpiri prus atesu de is interessus de chini traballat in custus cumpartus traditzionalis". "Ma - concluit Zuncheddu - s'economia sarda traditzionali no podit morri. Únius si bincit e is istitutzionis depint promovi s'unidadi".