Criminalidadi organitzada. Zuncheddu (Rossomori): "Arribbu de su boss camorrista Iovino àteru aciocu coloniali"

(IlMinuto) – Casteddu, 23 de su mes''e totussantus - "Cun su trasferimentu de su boss camorrista Antonio Iovino, in Badu 'e Carros, in regimi de 41bis, su Ministru Alfano inaugurat sa 'deportatzioni' in s'Ísula nostra de sa peus criminalidadi organitzada internatzionali e italiana". Ddu narat cun d'una nota Claudia Zuncheddu, consilleri regionali e presidenti de is Rossomori. "Su Guvernu italianu - acrarat sa sardista de sinistra - sighit a usai su territoriu sardu po is sdorrobbatórius suus de is risorsas o comenti 'cascita de s'àliga', muntonarxu de arrefudus radioativus e comenti logu de esercitazionis militaris po is scenarius de gherra. Is sardus no funt disponìbilis a fai diventai is presonis isulanus istrexus de sa criminalidadi organitzada de sa Mafia a sa Ndrangheta". Su mantessi Guvernu chi - acrarat Zuncheddu - no arrespetat sa lei 354/75 e su protocollu Istadu-Regioni po sa Territorialidadi de sa pena "po favorèssiri sa torrada de is presoneris sardus, chi funt abetendi su giudítziu o chi scontant is penas in is presonis atesu de s'Ísula, in is presonis de sa Sardigna".