Lota de is pastoris, aMpI: "Mps pedit su contu de 50 annus de industrializatzioni coloniali"

(IlMinuto) – Casteddu, 22 de su mes''e totussantus - "Cun s'atzioni fatta custu mangianu (cenàbara, ndr) s'Mps pedit difatis su contu de 50 annus de industrialitzazioni grai e foras de contu chi at arruinau fitas importantis de sa terra nostra e chi prusatotu at contribbuiu a sderrocai s'economia agropastorali". Aici su Diretivu natzionali de a Manca pro s’ Indipendentzia cummentat su blocu de is rastréglius de sa Saras de Sarròccu. Atzioni chi signat su cumintzu nou de sa lota de su "Movimento dei Pastori Sardi" a pustis de "su tradimentu" - fueddus de Felice Floris – de s'acórdiu de su 2 de su mes''e totussantus cun sa Giunta regionali. "Is finantziamentus previdius po sa massaria chi funt in su pranu de Renascida - sighit sa nota de aMpI - no funt mai stetius ativaus e su dinai est finiu totu in is buxacas de is pisciganis italianus comenti Moratti e Rovelli chi ant fattu fortuna in is pabasas de sa natzioni nostra e de s'economia nostra".
"Arregordaus - precisat sa nota de s'organitzazioni de sa sinistra indipendentista - ca in is giornalis de s'època beniant pubblicadas pubblicidadis chi narànt a is pastoris de diventai operàjus. Mantessi pensu teniant is partidus colonialis de sa Dc e de su Pci e in is sindacaus Cgil, Cisl e Uil chi saludànt su progressu e imbidànt a is pastoris a si lassai a is pabas tallus e pensus arcaicus".