Mps “sequestrau” in Civitavecchia. Floris: “Unu cordinamentu mediterraneu de is pastoris”. Sa solidariedadi de Sni, Sns e Rm

29 Mese de idas 2010
Image
movimento-pastori-sardi2-150x79.jpg


(IlMinuto) - Casteddu, 29 de su mes''e paschixèdda - Crescit sa solidariedadi donada a su Movimento dei Pastori Sardi a pustis de is fattus de Civitavecchia. Ariseru a mangianu prus de 200 pastoris funti stetius firmaus e "arropaus" de sa giustítzia in su portu in Laziu. A is allevadoris esti stetiu impediu de andai a Roma in pullman (is cincu mezus annolitaus funti stetius sequestraus) o in trenu, aundi - at nau Felice Floris - Mps iat ai fattu una cuferéntzia de imprenta po annuntziai sa creatzioni de unu Cordinamentu mediterraneu de is pastoris, cun s'agiudu de is collegas de sa Grecia, de sa Corsica e de sa Spagna. "Seus ananti a provas tennicas de fascismu chi no si podint nemancu pensai", at nau su consilleri regionali de is Rossomori Claudia Zuncheddu. "Ariseru esti stetiu su turnu de is istudiantis, oi de is pastoris - at aclarau sa sardista de sinistra - cras at essi su turnu de chinisisiat persona chi at a arziai sa conca po defèndiri is diritus suus e su diritu a su traballu po sei e po sa familia sua"."Is pastoris - at precisau su cordinadori natzionali de Sardigna Natzione Indipendentzia Bustianu Cumpostu - funti stetius pigaus a corpus poita ant portau sa protesta a is portas de Roma. Ant fattu beni a arriscai. Sa protesta est comenti sa gherra, po fai in modu chi siat visìbili tocat a dda portai adomu de s'anemigu, e firmai su 'raccordo anulare' e no sa ss 131".

Is fattus de ariseru donant a su Sindacadu de sa Netzione sarda un'arrexioni in prus po no afestai a is 150 annus de s'Unidadi de s'Italia.

"Is pastoris sardus - iscririt s'imbasciadori Anghelu Marras - iant pensau de manifestai in Roma contra a is políticas econòmicas de sa massaria portadas ainnanti contra a custu cumpartu meda importanti de s'economia nostra, perou, allestru, su 'Stadu de is 150' castigat puru a s'intentzioni prus simpli de manifestai su propriu disacórdiu, si puru sa Costituzioni italiana ddu previdit".



© RIPRODUZIONE RISERVATA