Nucleari: sa Corti costitutzionali frenat a is progetus de su Guvernu. Repubricanos: “Su pópulu sardu no si dromat”

(IlMinuto) - Casteddu, 4 de su mes''e fiàrgiu - "S'artículu 4 de su Decretu legislativu de su 15 de su mes''e fiàrgiu de su 2010 ("Disciplina de s'identificatzioni, de su cumprimentu e de s'esercítziu in su territóriu natzionali de impiantus de produtzioni de energia elétrica nucleari") est in scontróriu cun sa norma de sa Costitutzioni. Est cantu at nau sa Corti Costitutzionali cun sa senténtzia 33 de su 2011. Sa decisioni de sa corti Suprema est un'impíciu sériu po sa torrada de su nucleari programmada de su Guvernu. Immoi s'Esecutivu at a depi pigai in cunsidériu su parri de is Regionis in matéria de progetatzioni e fàbbricu de una centrali in territóriu regionali. E su beranu chi benit, po su referendum asuba de s'àtomu in Sardigna, su pópulu sardu at essi lamau a arrespundi a sa dimandha: "Sei contrario all’installazione in Sardegna di centrali nucleari e siti per lo stoccaggio di scorie radioattive da esse residuate e preesistenti?". Asuba de sa senténtzia ant fueddau is Repubricanos de Sa Costituente. "Cun custa - senténtzia si ligit in su documentu - de fatu si fait apellu a sa boluntadi de dógnia regioni po decidiri si aghilliri o no aghilliri in su territóriu insoru a is centralis nuclearis. Nonostanti custu, s'impignu de is Repubricanos de totus is indipendentistas e de totu su pópulu sardu, depit sighiri po straviai po sèmpiri cust'arriscu mannu po su territóriu nostru. Sa classi política autonomista [...] s'iat a podi giogai calencunu tirixeddu. Po custu motivu no si depeus drommiri".