Rifondazione asuba de is primarias in Casteddu. Su segretàriu Fresu: "Eus a acotzai a Zedda, ma at pigau 2500 votus senz''e berífica". Deriu (Togliatti): "Arrennéscida indiscutìbili"

(IlMinuto) - Casteddu, 2 de su mes''e fiàrgiu - "Nos eus sèmpiri arremaciau chi puru no faendi is primarias nd'iaus arrespetais sa sceda, e at essi aici puru in custu càsu". Cun custus fueddus su segretàriu de su Prc, Gianni Fresu, arremaciat s'acotzu de Rifondazione a Massimo Zedda (Sel), bincidori de is primarias, e smincit a is "contus metropolitanus asuba de su pensu nostru po is primarias casteddaias". Ma nemmancu in cust'ocasioni su segretàriu de Rifondazione e istudiosu de istoria iscritu in su círculu Gramsci de Casteddu cuat is dudas asuba de s'istrumentu de is primarias. "Su fatu chi su candidau a síndhigu de Casteddu siat s'arresurtau de 2500 votus senz''e nisciuna berífica (poita custu funt is votus de is primarias) - acrarat Fresu - est unu problema políticu. Is fortzas chi acotzànt cun cunvintzioni custa prova de fortza furiant a cuncordiu a cunsiderai cussu de is 10milla eletoris su livellu giustu po crei custu cunfrontu sériu". A is urnas funt invecis andaus pagu prus de 5milla eletoris. Asuba de is primarias casteddaias fueddat puru, cun tonus diversus, un'àteru rapresentanti de Rifondazione comunista in Sardigna, Giovannino Deriu, cumponenti de su Cumitau políticu regionali de su Prc e responsàbbili de s'organizatzioni de su Círculu casteddaiu Togliatti. "No seu unu sustenidori de s'istrumentu 'primarias' - precisat Deriu - e no dd'apa diventai cun facilidadi. Zedda at bintu [...] po is temas bellus chi at scipiu ponni in campu espressendi sèmpiri un'impostadura de sinistra. In prus de su metodu primarias ddoi est sa sustàntzia de un'arrennéscida indiscutìbili de Massimo Zedda".