Zuncheddu lassat a is Rossomori e fait un’apellu a is indipendentistas: “Gherraus impari po libberai a su pópulu sardu”

(IlMinuto) – Casteddu, 10 de su mes''e fiàrgiu - Is Rossomori in Consillu no funt rapresentaus prus de Claudia Zuncheddu, eligia in s'assembrea de bia Roma in su mes''e fiàrgiu de duus annus fait, at difatis decídiu de lassai su movimentu - nàsciu de unu scisma a sinistra de su "Partito Sardo d’Azione" - po mori de is divergéntzias mannas cun sa segreteria Muledda. Sa consillera indipendentista acusat a sa dirigéntzia atuali de is Rossomori de tenni aintru pagu democratzia, dd'acusat de una tendentzia a mantèniri su poderi decisionali in manus a pagus dirigentis e de s'auséntzia de unu raportu cun is lotas socialis, a cumentzai de cussas de su "Movimento Pastori Sardi". Sa dirigetzia de is Rossomori - at nau Zuncheddu - no at donau nisciunu agiudu a is mobilitadas de custus mesis de Mps. Mentris po mimi furiat naturali a essi acanta de su pópulu chi lotàt". In Consillu regionali Zuncheddu at a sighiri a fai parti de su grupu cun Sel (Uras, Zedda, Sechi) e "Federazione della Sinistra" (Ben Amara), ma cun s'iscopu de favorèssiri unu caminu de unificatzioni tra is indipendentistas e de promovi unu discursu cun is fortzas progressistas e ambientalistas. A sa cuferéntzia de imprenta furiant presentis diversus militantis de Sardigna Natzione e puru Gavino Sale de s'Irs. "Teneus un'obbietivu únicu", at acrarau Zuncheddu ammentendi is raportus bonus cun Irs, Sni e aMpI: "Su caminu de libberatzioni natzionali chi si depit portai a s'indipendentzia e duncas a sa mancebatzioni de unu pópulu. Si depeus batiri totus impari".