"Sa vida balit de prus de su dinai de is meris", in Pauli assembrea contra a su nucleari in ammentu de Sergio Perniciano

(IlMinuto) – Casteddu, 30 de su mes''e martzu - Su 15 de su mes''e maju is sardus ant essi lamaus a is urnas po arrespundi a sa dimandha: "Ses contràriu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o preesistentis?". A 45 diris de su referendum regionali si fait sèmpiri prus mannu s'impignu de is organizatzionis contràrias a sa torrada de s'energia nucleari bófia de su Guvernu Berlusconi. Sàbudu 2 de su mes''e arbili in Pauli (17.30, bia de su Redentore 215) s'at a tenni un'assembrea púbblica promòvia de Sinistra Critica. "Sighit s'apretu in Fukushima, lompendi a 3 cidas de su tsunami – si ligit in d-una nota de imprenta fatta connosci de s'organizatzioni anticapitalista - is livellus de radioatividadi in su mari acanta a sa centrali funt prus mannus de 3.555 bortas de comenti iant a depi essi. Sa destrossa giaponesa cunfirmat chi is lógicas de su capitalismu portant a sa morti, ma sa vida nostra balit de prus de is profetus de is meris e de is lobby e is referendum dd'ant fai bessiri a pillu". A s'assembrea - oberta de is relatus de is citadinus - ant a participai Gianluigi Deiana (Sinistra Critica- Cumitau Sinonucle), Rosalba Meloni (Cagliari social forum – Cumitau Sinonucle), Federico Carboni (Usb Sardigna), Cristiano Sabino (a Manca pro s’Indipendentzia), Mariella Cao (Cumitau Gettiamo le basi), Antonello Tiddia (Rsu Carbosulcis), Marco Ghinolfi (Prc) e Salvatore Drago (Collettivo anticapitalista sardo). "Sa Sardigna - precisat sa nota de imprenta - no creit a sa suspensioni- trampa de su Guvernu: su 15 de su mes''e maju e su 12 de su mes''e làmpadas is sardus ant a votai de eja, ant a bullai su nucleari po sceberai de camminai in sa s'istrada de is energias rennòvabilis". In s'atóbiu, a cinc'annus de sa morti, at essi ammentada sa figura de Sergio Perniciano (dirigenti comunista tra is fundadoris de Sinistra critica in Sardigna e amministradori in sa citadi de Pauli).