“Sindrome de Quirra”: su Consillu bullat a is odg de centrusinistra e centrudestra. Fueddus tra Zuncheddu e Cossiga

11 Martzu 2011
Image
uranioimpoverito_quirra-150x150.jpg


(Minuto) – Casteddu, 11 de su mes''e martzu - Pàgini légia meda po su Consillu regionali de sa Sardigna. S'auséntzia de 31 consilleris e is diversas astensionis ant impidiu a s'àula de bia Roma de pigai in forma uficiali positzioni asuba de sa "Sindrome de Quirra". Cun 23 sì, 14 no e 11 astènius (senz''e arribbai a sa majoria pedia de 25) su Consillu regionali at difatis arreusau un'odg presentau de sa majoria, primu a ai firmau Petro Pittalis (Pdl). Un'odg "asuba fe su fenómenu sanitàriu grai de is neoplasias" in su territóriu de Quirra, po su prus, in su tretu de sa basi de Capo San Lorenzo. S'assembrea at arreusau (22 sì, 22 no e 4 astènius) s'odg presentau de su centrusinistra (primu a ai firmau Claudia Zuncheddu) chi at arregortu is votus de su Psd’Az  e de Roberto Capelli (Grupu ammasturau) e de Matteo Sanna e Ignazio Artizzu de s'Udc-Fli. Sa "motzioni Zuncheddu", presentada su 5 de su mes''e gennàrgiu e discutia ariseru, est stetia bullada gratzias puru a sa decisioni de Renato Soru de no dd'acotzai poita - narat sa Nuova Sardigna - "moderada meda". In sa presentada de su documentu s'indipendentista Zuncheddu at arregordau is datus de su relatu de is veterinàrius Lorrai e Melis (su 65% po centu de is pastoris chi traballant acanta de su Poligonu de Capo San Lorenzo tenint formas de tumori grais meda) e at acusau a su sotosegretàriu de sa Difesa, su sardu Giuseppe Cossiga, de ambiguidadi.

Cossiga - at nau Zuncheddu - "promitit de firmai a is atividadis missilisticas si s'at a avreguai ca is ghierras fintas funt sa causa de custus malis".

"De ambiguidadi no ddoi est nudda" - at arremaciau Cossiga cun d-una nota de imprenta - "su Parlamentu at impignau a su Guvernu a frimmai a is atividadis de su Poligonu si at essi provau chi faint mali a sa saludu, Puntu".




© RIPRODUZIONE RISERVATA
Tags