Referendum nucleari: Cumpostu (Sinonucle): "No a is fabas de Berlusconi. Su 15 de su mes'e maju totus a votai"

(IlMinuto) – Casteddu, 29 de su mes'e arbili - "S'arretiru de su nucleari est unu fingimentu". Est cantu denunciat cun d-una nota de imprenta su cordinadori de su Comitau Sinonucle, Bustianu Cumpostu, agoa de is dichiaras de su presidenti de su Consillu Silvio Berlusconi. "Seus assolutamenti cumbintus - at nau Berlusconi in is diris passadas - ca su nucleari siat su tempus benidori po totu mundu. Si furiaus andaus oi a cussu referendum (ndr, su referimentu est a su referendum abrogativu de su mes'e làmpadas) po annus meda su nucleari in Itàlia no iat essi stetiu possíbbili". Su Governu timit duncas a s'opinioni púbblica "influentzada" de sa destrossa Fukushima. Ma su referendum sardu de su 15 e de su 16 de su mes'e maju abarrat bàlidu. "Su referendum nostru contr'a su nucleari - precisat Cumpostu - no podit essi tocau de su Guvernu, sa batalla abarrat cussa de sèmpiri. Su cumitau Sinonucle cumbidat a totus is sardus a andai a is urnas su 15 de su maju po votai EJA a su referendum contr'a su nucleari in Sardigna". "Aristanis - precisat Cumpostu - est stetia sceberada comenti logu principali in s'Ísula aundi ant a benni incungiaus is arrefudus radioativus chi benit de is centralis bécias".