Referendum nucleari: sa Sardigna a su votu su 15 e su 16 de su mes'e maju: Corimbi "No si fadeus frigai: andaus totus a votai EJA"

(IlMinuto) – Casteddu, 21 de su mes'e arbili - Nisciunu passu agoa asuba de su nucleari, ma scéti unu rinviu temporàneu po mori de s'efetu emotivu chi at creau sa destrossa de Fukushima: cun sa relata sua in Parlamentu su Ministru de s'Isvilupu económicu, Paolo Romani, at acrarau cali funt is intentzionis de su Guvernu. Ariseru su Senau at aprovau su decretu chi scancellat a is normas chi torrant a ponni a su nucleari. Immoi po fai annullai diaderus a is referendum de su 12 e de su 13 de su mes'e làmpadas tocat chi su decretu siat aprovau puru de sa Camera. Invecis su referendum sardu in programma po su 15 e su 16 de su mes'e maju abarrat in pei e sighit a tenni totu s'importu suu. Tra pagus cidas is sardus ant a arrespundi a sa dimandha: "Ses contràriu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o preesistentis?". Lisa Corimbi, candidada a Síndhigu in sa citadi de Terranòa po s'alleàntzia indipendentista, cumbidat a is sardus a andai a votai. "Andaus a votai EJA contr'a su nucleari in su referendum nostru de su 15 de su mes'e maju", scririt Corimbi. "Funt ghetendi fumu in ogus - precisat su rapresentanti indipendentista - poita timint e faint beni. No si fadeis frigai: andai a votai. Est unu doveri sacru". Su referendum consultivu previdit unu quorum de su 33 po centu.