Contienda Tiscali: "Eja a is cuntratus de solidariedadi". Sinistra critica sarda: "Soru acusau de frosu. Si dimitat de su Consillu"

(IlMinuto) – Casteddu, 21 de su mesi de cabudanni - Passus ainnantis po sa contienda Tiscali. Ariseru, in s'atopu cun is sindacaus, s'azienda at nau de essi fasia a aghilliri sa proposta de Cgil, Cisl e Uil: fai arricursu a is cuntratus de solidariedadi po evitai de ponni in càscia integratzioni pagu prus de 130 traballadoris de s'azienda, comenti iat fatu sciri cida passa s'amministradori delegau Renato Soru. Asuba de s'acuntéssia fueddat Sinistra critica sarda. "Sa crisi- scririt s'organizatzioni anticapitalista - comenti sèmpiri benit fata pagai a is traballadoris: is berus produtoris de arrichesa e de connoscéntzia. Puru s'eventuali obertura aziendali a is cuntratus de solidariedadi iat a creai un'irminorigamentu de su tipendiu de is traballadoris. No ddoi funt 'meris de manca', e sa contienda Tiscali cunfirmat custa beridadi". Is acusas friscas de frosu fiscali fatas a Soru faint pediri a Sc is dimissionis de s'amministradori delegau de Tiscali, consilleri regionali de su Pd cun unu númeru mannu de auséntzias de is traballus de s'àula. "Soru si dimitat de su Consillu - si ligit in sa nota - e dongat su dinai pigau de su 2009 a oi in faori de unu fundu de solidariedadi fatu nasci po is traballadoris".