Fata s’ingiustitzia. Dispàciu a s’obrescida po is Sariu. Is cumentus de aMpI, Sni e Zuncheddu

(IlMinuto) – Casteddu, 22 de su mesi de cabudanni - Centu óminis a pei, duus elicoterus a acastiai su tretu sa scicuta de is telefonus. Custa borta sa cadena de solidariedadi fata de indipendentistas, pastoris, artesanus e butegheris - chi iat protegiu a Angelo e a Rosalba in su mesi de maju e in su mesi de argiolas - no at potziu frimai sa scicuta fata a is Sariu bogaus de Terra Segada (Crabònia) innoi s'agatàt domu insoru e innoi funt is terras insoru. Beni bendius a s'asta po mori de sa lei regionali 44 de su 1988: filla de is murigus de is políticus sardus. Sa scicuta dd'ant fata a obrescidórgiu. Aici sa cadena de solidariedadi fata de féminas e óminis no est potzia nasci in tempus po frimai, cun sa resisténtzia passiva, un'operatzioni programada cun cuscéntzia. De su merì de martis is fortzas de s'òrdini ant pichetau is arrugas po lompi a Terra Segada. A is seti de su mangianu de ariseru su "blitz": s'intrada in sa domu de is Sariu, sa scicuta de is telefonus - po frimai is dimandas de agiudu - e sa scicuta. Scicuta po fai logu a su meri "legitimu": una personi chi - aprofitendusì de is arragus de is Sariu, prenus de dépidu cun is bancas po mori de sa lei 44 de su 1988 - at comporau po 130 milla eurus una domu de 400 metrus cuadrus e is satus po 90 étarus. "Sa família Sariu - comentat in d-una nota aMpI - est un'àtera vitima de sa fura legalizada de Equitalia, ma est puru un'esémpiu mannu de resisténtzia contra a is angarias chi ponit in genugu sémpiri de prus su pópulu […]. Custa fura schifosa chi est legali po is leis de su stadu italianu ,  su sensu de giustítzia sardu invecis no dda podit poderai". Dda pentzat in su mantessi modu Claudia Zuncheddu, consilleri regionali indipendentista. "Sa lei - scririt Zuncheddu - at bintu: una família at perdiu su traballu e sa domu e totu e su frutu de annus meda de traballu est stétiu bendiu asuta de prétziu in faori de canis continentalis. No podeus prus permiti chi custa fura, legalizada de is tribunalis e de Equitalia, sigat a fai dannu a is famílias sardas". Su cordinadori de Sardigna Natzione, Bustianu Cumpostu, proponit de sighiri sa mobilitada. "Sni - si ligit in d-una nota - declarat sa própriu disponibilidadi a si movi in d-una lota paxiosa chi blochit a chini at comporau a s'asta e no ddi fatzat pigai possessu de is benis liaus a Angelo e Rosalba".