Lei asuba de su Golf, aMpI: "Dónnia campu at a spaciai 2milla metrus cubus de àcua a sa diri. Comenti una bidda de pagu prus de 8milla abitantis"

(IlMinuto) – Casteddu, 20 de su mesi de cabudanni - "Un'àtera fura manna a su patrimóniu naturali e ambientali de sa Sardìnnia". Aici su Diretivu políticu natzionali de a Manca pro s’Indipendentzia chistionat de sa lei asuba de su turismu aprovada cida passada de su Consillu regionali, cun 36 votus in faori de is rapresentantis de Pdl, de s’Udc-Fli e de is Riformatoris sardus". "A sa faci de sa crisi" - scririt aMpI in su documentu - su Consillu regionali sceberat de donai "45 milionis de euros a su Golf". Intre is medas annotus su scritu precisat su consumu mannu de àcua chi fait dónnia campu po sa pràtiga de custu sport. "Dónnia campu de Golf de tipu médiu […] – si ligit in su profundamentu - spaciat in média 2milla metrus cubus de àcua a sa diri, est a nai 730milla metrus cubus de àcua a s'annu. In pagus fueddus totu custu bolit nai ca dónnia 24 oras unu caminu de custu tipu 'bufat' sa mantessi cantidadi de àcua spaciada de una bidda de pagu prus de 8milla ànimas". "In pagu fueddus - acrarat su documentu - cun custas istruturas turisticas si liat, in perfetu stilu coloniali, arrichesa a sa Natzioni, lendii puru a is sardus sa possibilidadi de svilupai calisisiat atividadi economica chi no siat  profetosa po s'isfrutamentu coloniali".