Referendum contra a su “Porcellum”: arregortas 4milla firmas in s’isciòpiru. Cumpostu (Sni): “Est una trampa”

(IlMinuto) – Casteddu, 7 de su mesi cabudanni - Sighit s'arregorta de is firmas in acotzu de su referendum contra a sa lei eletorali "Porcellum" po torrai a su "Mattarellum" (75 po centu de parlamentaris eligiu cun su magioritàriu, 25 po centu cun su proportzionali). Po is promotoris in Sardìnnia - po s'isciòpiru generali de ariseru - funt stétias pigadas 4milla firmas e prus in Sardìnnia, cun su trisinamentu de rapresentantis de Sel, Idv, Pd, Fli, Rossomori, Verdi e Radicali. Narat invecis ca no a su referendum Bustianu Cumpostu, cordinadori natzionali de Sardigna Natzione Indipendentzia. "Nos - precisat Cumpostu - no eus a firmai po su referendum trampa. Intre "Porcellum" e "Mattarellum" teneus arragus a nai cali siat sa lei eletorali peus. S'una e s'àtera […] ponint is candidaduras scéti in is manus de is segreterias de partidu"."Cumbidaus - concluit su cordinadori de Sni - a is sardus a no firmai po custu progetu referendàriu est a nai po torrai a ponni su 'Mattarellum' e no scèti poita fait schifu cantu su ‘Porcellum’, ma poita no boleus chi is sardus bengat arringheraus, cun sa trampa, in duus trintzeramentu chi no ddis pertocant".