S'EDITORIALI. Comenti incuisiri unu movimentu políticu: aMpI a protzessu

(IlMinuto) – Casteddu, 29 de su mesi de fiàrgiu - Po cantu siant passaus mesis, certas acontéssias no s'ant a podi scaresci mai. Sa de s'Operatzioni Arcadia primu e agoa sa de su protzessu Bellomonte no funt de seguru acuntéssias disconnotas, antzis, frúminis de tinta de iscriri funt stétius impitaus scriendiddas prus de una bia in is pàginis de is giornalis. Protagonista est a Manca pro s'Indipendentzia, chi bit su nòmini suu sbatiu in d-un'artículu chi tenit po títulu "Terrorismu, a giudítziu 18 imputaus. Tucat su protzessu contra a a Manca pro s'Indipendentzia" bessiu ariseru in is pàginis de unu de is prus importantis cotidianus sardus. Ses is indagaus de sa manca indipendentista - no totus iscritus a aMpI - chi andat a s'aciungi a sa lista de personis giai trisinadas in is arrestus de su 2006 cun s'acusa de "assótziu avolotadori indiritzau a su terrorismu".Comenti acadessiat cun s'Incuisitzioni, benint acusaus imbastendi un'istória po discreditai un'idea, unu pentzu, donendi crupas, interpretendi cumportamentus e troghendi is fatus po cumprovai una presunta nexi. In su fàbricu de custus teoremas, est bastanti andai a biri sa cassa a is brúscias chi at lassau po 29 mesis a Bruno Bellomonte in galera a Viterbu e Sianu, sa frimesa bera de is proas no est fundamentali. Is vidas truncadas, perou, funt beras.