Documentu. Movimentu de Liberatzioni Natzionali Sardu denuntziat a s'Itàlia a s'Onu
A sa Respetabili Onu
Director General
Mr. Kassym-Jomart Tokayev
Palais des Nations
Avenue de la Paix 8-14
1211 Geneva 10
Switzerland
E po du sciri
A Tottus is Stadus Terzus
Chistionis in ogetu: Denuntzia de ocupatzioni, dominatzioni, colonizatzioni de sa Natzioni Sarda po manu de su stadu strangiu italianu Declaratzioni de Soberania de su Populu Sardu
Cun custu paperi oficiali su Movimentu de Liberatzioni Natzionali Sardu (Mlns) pretendit sa soberania de su Pòpulu Sardu coment’e deretu cosa sua e esigit sa liberazioni de sa Natzioni Sarda de s’ocupatzioni foras de lècitu e foras de lei de su Stadu stràngiu italianu.
A sa Natzioni Sarda e a su pòpulu suu, storicamenti indipendenti de su IX a su XV seculu, est proibiu a imperai su deretu de lei a sa soberania in su Logu cosa sua, po nexi de s’ocupatzioni de s’Italia, stadu stràngiu, colonialista e ratzista.
Storicamenti sa Natzioni Sarda de su 1409 at dèpiu poderai s’ocupatzioni de sa Corona de Aragona, in su 1718 de s’Austria e de su 1720 de is Savoia. De su 1861 nc’est a pustis “de jure e de facto”, s’ocupatzioni foras de lei, illècita e tambeni violenta e apetigadora, fintzas militari, de su stadu stràngiu italianu.
Postu ainnantis custu
S’Organizatzioni de is Natzionis Unias pongat passus lestrus, impari e de acòrdiu cun custu
Movimentu de Liberatzioni Natzionali Sardu, po afiantzai s’acabbu de s’ocupatzioni foras de lècitu e de lei de su stadu stràngiu italianu in su Logu de sa Natzioni Sarda.
Dongat atentzioni e siguràntzia chi su stadu ocupanti s’arretirit deaderus e illuegus, cun is istitutzionis cosa sua e is forza armadas, de su Logu de sa Natzioni Sarda
Afiantzit s’istitutzioni de sa Politzia Sarda e di pongat a su costau forza propria chi si pongant intra s’una e s’atera natzioni, mandendiddas a is làcanas territorialis e mandendi genti sua, Castiadoris, po fai a manera chi si potzant fai is liberas eletzionis de is Organus Istitutzionalis nous de su Populu Sardu
Agiudit e amparit, finta cun finantziamentus “ad hoc” su processu po torrai a fai e fabbricai a nou sa Natzioni Sarda
Cundennit su stadu stràngiu italianu a torrai totu is dannus fatus po arrexoni de s’ocupatzioni impari a is dannus poi s guerra mondialis e colonialistas e a torrai is dannus de sa leadura fiscali foras de lei de su 1861 fintzas a sa dì de acabbu in fatus e in fueddus de s’ocupatzioni chi eus nau in ptzus.
Pighit atu
- chi s’est formau e costituiu su presenti Movimentu de Liberatzioni Natzionali Sardu, nasciu sceti cun sa punna e po sighiri sa tenta de liberai su Populu Sardu de s’ocupatzioni, de sa dominazioni e de sa colonizatzioni posta in atu de su stadu stràngiu italianu.
- De sa legitimatzioni de custu Movimentu de Liberatzioni Natzionali Sardu a si movi e a fai atus in nòmini e po contu de su Pòpulu Sardu in is chistionis internatzionalis po mèdiu de s’aparau istituzionali propri, comenti narat e portat a cumprimentu s’artìcolu 96.3 de su Primu Protocollu de Ginevra de su 1977
- De su balori artu meda e de importu mannu chi custu documentu tenit po su Pòpulu Sardu e chi issu siat pigau e cumprèndiu in su prus artu significau cosa sua mancai arruat in farta in calincuna de is partis suas, sentza de essi cumprèndiu mali e sentza de essi murrungiau in nisciuna de is chistionis chi ponit e prus che totu chi nisciuna chèscia donghit manera po d’arrefudai.
Aterus documentus e paperis ant a essi mandaus o portaus candu nci at essi sa necessidadi.
Po su
Movimentu de Liberatzioni Natzionali Sardu
Sergio Pes (Su Presidenti)