Rimbussu consilleris regionalis. Salis Idv: "No apu pigau parti a s'iscritura, a sa discussura e a su votu asuba de sa lei fata po torrai a ponni is rimbussus. aMpI: "Is pagas insoru funt amparas beni meda"

(IlMinuto) – Casteddu 20 de su mesi de làmpadas - "Is babus de sa bufonadura e de is agràbius in pratza contra de mimi ndi ant a depi arrapundi in totus is domus". Est cantu afirmat Adriano Salis, capugrupu Idv in consillu regionali, po s'insertamentu de su nòmini suu in s'elencu de is consilleris ligiu a boxi manna in su sit in chi s'est sboddiau in is diris passadas asuta de sa domu de su Consillu. "No potzu aguantai is modus de fai amaletzosus e is afrentas, chi s'acostant a su 'squadrismo'" - pretzisat Salis - "No apu pigau parti a s'iscridura, a sa discussura e a su votu asuba de sa lei fata po torrai a ponni is rimbussus de is consilleris regionalis". A petus de is agràbius, de is tzerrius e de is aigus su consilleri de s'Idv s'abetat "is iscusas de is autoris e de is aprontadoris de su trumbullu". Apitzius de sa chistioni rimbussus s'espressat a Manca pro s'Indipendentzia puru: "Is chi funt andaus a votai funt stétius trampaus, - afirmat aMpI cun d-una nota de imprenta - comenti iaus circau de nai nos, e a sa faci de issus etotu ant afortiau a is meris de is partidus italianus, àteru ca 'bitória manna de su pópulu sardu' […]. Àteru ca irminorigai sa paga de is consilleris! Àteru ca 'abolitzioni' de is rimbussus!". Difatis, sighit su comunicau de sa manca indipendentista, "su dinai chi si pretendiat de ndi liai a is políticus est stétiu torrau a ponni allestru, comenti s'iaus nau, puru po custa cosa, nos, e is pagas insoru funt amparas beni meda". "Aici is sardus ant fuliau un'iaxi de dinai po unu referendum chi teniat comenti iscopu únicu su de promòviri sa carriera política morri morri de calincunu 'isteddu' de s'italianismu comenti funt Prato e Vargiu!".