"Cosa de papai po sa menti e cosa de papai po sa carena": in Casteddu sa Sardigna in su pratu

(IlMinuto) – Casteddu, 23 de su mesi de ledàminis - Si lamat "Cosa de papai po sa menti e cosa de papai po sa carena" s'atopu gastonòmicu nàsciu de una bidea de Stefano Cruccu, s'imbentori de is giassus Crastulo e Scontu, chi s'at a isboddiai in is diris 23 e 24 de su mesi de ledàminis. Sa proposta - si ligit in d-una nota de imprenta - "tenit iscopus medas intre is calis, torrai a pesai is béndidas de is ristorantis, [...] fadendi torrai a iscobèrriri is antigas traditzionis de sa coxina sarda". S'arretzeta previdit pagus ingredientis: unu chef bravu meda, una fibera de pratus traditzionalis e póberus chi no s'agantant in is coxinas de is ristorantis, is cumbidaus e una letzioni bera de culinària innoia at essi ispiegada sa nàscida de dógnia pratu. Totu costu in su coru de Casteddu a s'ora de cena. Dógnia cumbidau at podi atastai totu su menù fatu de dexi portadas e binu po unu prétziu de 19 eurus. S'avenimentu, promòviu de Arretzetas de Sardigna e de Scontu, at a tenni comenti de guarnícia is Cantinas de su Ritual, su ristoranti chi s'agatat in arruga Universidadi 33, in su bixinau de Casteddu de susu in Casteddu. Diversus is pratus chi ant essi serbius in is duas diris. Intre custus su pani fratau, sa supa galluresa, su mazamurru e sa seada