In tempus de crisi pigai parti est rivolutzionàriu. Assembrea e isciòpiru generali de su 7 de su mesi de totussantus

(IlMinuto) – Casteddu, 25 de su mesi de ledàminis - Sa Sardigna est in genugu. Contra a is bocidoris suus sa Confederatzioni Sindacali Sarda lamat po totu sa diri de su 7 de su mesi de totussantus chi benit un'isciòpiru generali de totus is zenias traballadoras de sa Sardigna siat públicaa ca privadas. "Custu isciòpiru - afirmat su Segretàriu Natzionali de sa Css Giacomo Meloni - serbit po denuntziai a su disacatu chi ferrit a totu sa Sardigna contra a sa disgana de is classis dirigentis, po su prus de sa classi política regionali surda a is apellus de su pópulu sardu chi no podit prus poderai annus de trascuràntzia e de aprofitu a dannu de is bisóngius, de su beni comunu e de is interessus de sa Sardigna". In sa mantessi diri in bia Roma, a faci de su palatzu de sa Regioni, s'at a isboddiai un'assembrea manna de su pópulu Sardu aprontada de sa Consulta Rivolutzionària. In abetu de sa diri de protesta sighint in totu s'ísula is assembreas teritorialis. S'atopu chi benit est fissau po cenàbara 26 de su mesi de ledàminis in Tàtari in arruga Cetti, aundi a Manca pro s'Indipendentzia at a fai un'atopu po acrarai su caminu e is progetus de sa Consulta Rivolutzionària e po aprontai sa cabada casteddaia de su 7 de su mesi de totussantus. Su traballu preparatoriu atravessat perou chentza de pàsiu sa Sardigna de tramuntana a meridioni. Agoa de Tàtari, difatis, sàbudu 28 Casteddu puru at essi protagonista de un'atopu, chi s'at a isboddiai in su magianu in arburada Trento, aundi sa Consulta at a acrarai is arrexonis de s'isciòpiri generali e de s'assembrea de su pópulu Sardu ai custa ora iminenti.

Fotografia de Pio IX. Pigada de Flickr