Serbariu: pani e sànguni. Sa lézida de a Manca pro s'Indipendentzia

16 Onniasantu 2012
Image
serbariu-300x289.jpg


(IlMinuto) – Casteddu, 16 de su mesi de totussantus - Furiant traballadoris chi pretendiànt is diritus insoru is chi funt cabaus in campu su 13 de su mesi de totussantus passau in su su Surcis. Traballadoris chi ant manifestau contra a su sólitu manestru callentau arregalau de is istitutzionis. Óminis, féminas e giòvanus chi si boliant torrai a pigai una dignidadi acacigada de diversas partis e in diversas ocasionis. Teatru de su lezítimu iscurrúnciu sa miniera de Serbariu, logu innoia si furiant abetendi is ministrus Passera e Barca, su sutasegretàriu De Vincenti, is rapresentantis de is istitutzionis de su territóriu e is sindacalistas de s'Alcoa. Un'atopu chi lassat su marigosori in buca. Is reportage tronaus in su web in custas úrtimas duas diris, difatis, s'amostant una realidadi càdria e sèmpiri de prus chentza de democratzia e arrespetu de is diritus. "Is operàjus ant blocau comenti azioni dimostrativa, is duas intradas a sa miniera - contat atressu de una nota de imprenta una rapresentàntzia de a Manca pro s'Indipendentzia - e acuitu funt cumentzaus is aciocus malus de sa polizia: corpus de manganellu e lagrimogenus asuba de sa truma disarmada [...]. Unu militanti nostru - sighit sa denúntzia - est abarrau ingotu a conca e a sa manu, in su mentras un'àteru manifestanti est stétiu fertu a su petus". "Fortzis no at imparau nudda - cumentat s'organizatzioni de sa manca indipendentista - s'acuntéssia de su pastori chi, in d-una manifestada in Casteddu, po sa mantessi arrexoni, iat pérdiu un'ogu! Duus operàjus ant tentu pistaduras malas e s'agatant oindì a ricóveru in s'ispidali Sirai de Crabònia". Sa denúntzia de aMpI ferrit a is sindacaus italianus puru. Difatis, a faci de is fueddus de Forresu, sindacalista de sa Fiom-Cgil chi afirmat "a nos importat sa firma de s'acórdiu", a Manca puntat su didu e arremaciat: "oi prus de sèmpiri e una borta galu" is sindacaus italianus "ant fatu biri de no essi capassus de rapresentai a is operàjus e de difendi a is interessus insoru".



© RIPRODUZIONE RISERVATA