“Brillant Mariner 2013”. Zuncheddu: violaus "printzipius de precautzioni e de 'proporzionalità'"

4 Ladàminis 2013
Image
Brillant-Mariner.jpg


(IlMinuto) – Casteddu, 4 de su mesi de ladàminis - Nisciunu pranu de amparu, populatzionis assuconadas e chi no scint, Regioni ausenti. Est custa sa Sardigna de is esercitatzionis militaris. Asuba de is acontéssias militaris chi ferrint a sa Sardigna, in data 2 de su mesi de làdaminis sa consillera regionali indipendentista de SardignaLibera Cràudia Zuncheddu at depositau un'interrogatzioni apitzus de s'aumentu progressivu de sa militarizatzioni de s'ìsula e asuba de is "fainas militaris grais" fillas de s'esercitatzioni "Brillant Mariner 2013". "Comenti denutziau giai àteras bortas - afirmat Zuncheddu - sa militarizatzioni de su territòriu nostru, su ddoi essi s'Itàlia e sa Fratzia, sighit a trastocai is 'printzipius de precautzioni e de "proporzionalità"' decretaus de su diritu internatzionali, de is diretivas de su Guvernu italianu e de sa mantessi Comissioni de spricullitu Parlamentari impignada asuba de su tema de is bunìficas e de sa serradura de is Poligonus Sardus, serradura perou sèmpiri denegada de su capu de Istadu Majori de sa Defesa". Is autoridadis militaris, difatis - pretzisat su consilleri indipendentista - "sighint a violai sa lei, cuendi a sa genti chi bivit in custus logus is fainas de gherra chi s'isboddint in su territòriu. Su decretu de lei 66/2010 acrarat ca, a faci puru de is proceduras de apretu, comenti est sa pigada allestru su mesi passau in su poligonu de Teulada, is populatzionis depant essi informadas primu". Disinformatzioni e auséntzia de seguresa po is tzitadinus: nisciuna arrespusta est difatis lòmpia asuba de su chi s'est fatu po s'amparu de is populatzionis e po is pranus de evacutzioni previdius de sa normativa.




© RIPRODUZIONE RISERVATA