Arborea: resèssida manna pro sa de 39 editziones de sa manifestatzione gatronòmica dedicada a sa pulenta

In duas dies milliaja de persones
20 Ladàminis 2022
in sa mesa

In sa Mesa - Est istada una festa manna. Semus faeddande de sa de 39 editziones de sa manifestatzione gastronòmica dedicada a sa pulenta, chi, a pustis de duos annos de firmu cajonadu dae sa epidèmia de covid-19, comente semper est istada organizada dae sa Pro Loco de Arborea, sa bidda in provìntzia de Aristanis chi bantat sa presèntzia de unas cantas minorias culturales: sos sardos, sos vènetos, sos friulanos. Massimamente pro more de sa presèntzia de sos venetos, in Arborea sa pulenta est una realidade gastronòmica importante pro sa coghina de su logu. Gosi, dae 40 annos pagu prus o mancu, Arborea afestat sa pulenta cun una sagra famada meda in su Campidanu e finas in totu s'ìsula; est una manifestatzione chi si faghet semper in su mese de ledàmine e ocannu l'ant fata in su fune de chida coladu.

Pro afestare custu màndigu de sa coghina tìpica de sa bidda, ocannu sa Pro Loco de Arborea at detzisu de allongare a duas dies su programma de sa festa. Sa sagra, difatis, l'ant fata sàbadu 15 e domìnigu 16 de ledàmine. Un'issèberu chi at fatu lòmpere a Arborea, e massimamente in pratza Maria Asusiliatrice, su tzentru de sa bidda, unas cantas milliaja de persones.

Tocat a lu sutalineare: est istada una resèssida importante e sos chi bivent in Arborea l'ant a regordare pro tempus meda.

Mancu a lu nàrrere: sa protagonista prus importante de sa festa est istada sa pulenta etotu, chi est istada ammaniada in unas cantas maneras. Difatis fiant 20 pagu prus o mancu sas barracas in ue si podiat tastare custu màndigu fatu a maneras diversas. In prus de custu, in sos "stand" ddoe fiat finas sa possibilidade de gustare àteros pratos tìpicos de sas regiones dae in ue sunt lòmpidos sos chi ant ammaniadu sa pulenta.

No est totu: tocat a sutalineare ca pro s'ocasione sa bidda in provìntzia de Aristanis at acasagiadu finas sa de 15 editziones de su Radunu natzionale de sos "Polentari d'Italia".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg