"Pecorino Romano DOP" protagonista in Frantza, Portogallu e Perù

Su Presidente de su Cunsòrtziu Gianni Maoddi sutalìneat: su "Consorzio per la Tutela del Formaggio Pecorino Romano" est ativu contra a sa mudada de su clima
17 Ladàminis 2022
in sa mesa

In sa Mesa - Su "Pecorino Romano DOP" est protagonista in Frantza, Portogallu e Perù: lu agatamus in sa fiera "Sial" de Parigi, in sa fiera de s'innovatzione agrìcula de Fundao e in sa Cunferèntzia internatzionale de sa "LCA Food" de Lima.

Sunt addòbios importantes pro promotzionare su produtu, ma finas pro istudiare s'istrategia de crèschida e dare unu contributu importante a sa salude de s'ambiente. L'at sutalineadu su Presidente de su Cunsòrtziu Gianni Maoddi, cando at pretzisadu ca su "Consorzio per la Tutela del Formaggio Pecorino Romano" est ativu contra a sa mudada de su clima. In Lima, difatis, sos tècnicos de su CNR ("Centro Nazionale Ricerche") ant presentadu su progetu "Life Magis", chi bidet su cunsòrtziu protagonista de sa batalla pro s'ambiente. Su disafiu est otènnere, in intro de unu cuntestu europeu, unu bulligheddu "green", est a nàrrere una tzertificatzione chi atestat sa capatzidade chi at un'azienda de produire sena de impestare su logu. At a èssere su "Ministero dell'Ambiente" at dare sa tzertificatzione etotu.

Su cunsòrtziu, pro canto pertocat su cumpartu de su late e de su casu, est s'ùnicu de totu s'Itàlia a leare parte a su progetu "Life Magis". S'obietivu? Balangiare su reconnoschimentu pro totu sa filiera.

No est acabbada inoghe. Custa est finas sa primu bia ca a livellu internatzionale at a èssere avalorada s'imprenta ambientale in sa produtzione de su late de berbeghe. Fintzas a oe, difatis, sos avaloramentos sunt istados fatos feti pro su late de baca.

In custos addòbios su cunsòrtziu est acostagiadu dae su "chef" Matteo Barbarossa.

In sa Fiera de s'innovatzione agrìcula de Fundao, su Presidente Maoddi est imbetzes istadu protagonista comente reladore in sas "Jornadas do queijo DOP do Concelho do Fundao". S'addòbiu est istadu aprontadu dae "Formaggi DOP Portoghesi" e dae sa munitzipalidade de Fundao. In sa Fiera de s'innovatzione agrìcula de Fundao est nàschida peri s'idea de costituire unu "network" tra sos Paisos de s'àrea Mediterrànea. Sa finalidade est sa de tramudare a sa polìtica comunitària sas istàntzias de su cumpartu berbeghinu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg