S'ògiu ermanu “Sardegna DOP”

In sa Mesa - S'ògiu ermanu "Sardegna DOP" est unu produtu chi at unu marcu de tutela giurìdicu; custu designat s'orìgine sarda, duncas sa calidade e sas caraterìsticas ligadas a un'ambiente geogràficu pretzisu.

Sa DOP ("Denominazione di Origine Protetta") "Sardegna" est una denominatzione indicada feti pro s'ògiu de olia bogadu in sas zonas de s'ìsula indicadas in su disciplinare de produtzione. S'ògiu ermanu a marcu DOP devet èssere otentu pro s'80% cun olia de ratza "Bosana", cun olia de ratza "Tonda di Cagliari", cun olia de ratza "Nera (Tonda) di Villacidro", cun olia de ratza "Semidana" e cun sos sinònimos issoro. Su 20% chi abarrat est fatu deti de olia de su territòriu. Est importante a sutalineare ca custu 20% non devet cunditzionare sas caraterìsticas de su produtu a marcu DOP.

Sos olivàrios idòneos pro sa produtzione de ògiu ermanu DOP "Sardegna" podent produire una cantidade màssima de olia de 120 ql/ha, cun una rendida màssima de sas olias in ògiu de su 22%.

S'ògiu ermanu cun denominatzione "Sardegna" devet àere caraterìsticas pretzisas, est a nàrrere ca devet àere un'agrore in "oleico ≤ 0,5%"; unu nùmeru de "perossidi ≤ 15"; "polifenoli totali ppm ≥ 100"; "tocoferoli ppm ≥ 100"; su colore andat dae su birde a su grogu, est a nàrrere ca su produtu devet àere unu mudamentu cromàticu comente colat su tempus, unu nuscu de frùtora, unu sabore de frùtora cun nuscos de marigosu e de pitzigosu; unu "panel test ≥ 7".

Su còmpitu de compidare e de tzertificare s'ògiu ermanu DOP cun denominatzione "Sardegna" est acumandadu a s' "Agenzia Agris Sardegna - Sezione Controlli olio extravergine di oliva DOP". In sa pàgina de s'Agentzia s'agatant sos elencos de sos "olivicoltori", de sos "confezionatori" e de sos "trasformatori". In prus bi sunt finas totus sos documentos netzessàrios a otènnere sa tzertificatzione, su disciplinare de produtzione e finas su marcu "olio extravergine d'oliva di Sardegna".

S'ògiu ermanu DOP a dominatzione "Sardegna" at finas unu cunsòrtziu de tutela, su "Consorzio Olio Dop Sardegna", chi at domo in Tàtari, a manera pretzisa sa sede s'agatat in carrera Enrico de Nicola, 1 - c/o "Università di Sassari". Su cunsòrtziu at peri unu giassu internet: www.oliodopsardegna.it.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22