Comunales 2023, in Assèmini sas proas Pd/5S pro sas regionales de annoas

Eris amus iscritu de sos Comunes chi su 14 e 15 de maju ant a èssere interessados dae sas votatziones pro su rinnovu de sos Cussìgios comunales. Duos de custos, Igrèsias e Assèmini, nche colant sos 15mìgia abitantes e, duncas, bi diat pòdere chèrrere unu segundu turnu.

E movet dae unu de custos duos Comunes sa noa de oe. In Assèmini Pd e M5s ant seberadu su sìndigu issoro. Diego Corrias, pentisteddadu e giai cumponente de sa Giunta ghiada dae Sabrina Licheri. Narant sos duos partidos, pro mèdiu de nota istèrrida a cumone, dea àere fatu su sèberu in continuidade cun s’esecutivu coladu e in cunformidade a sos «valores progressistas». Su sèberu l’ant ufitzializadu a sa vigìlia de sas primàrias de su Pd e in tempus pro propònnere unu fronte ampru pro sas regionales de annoas.

M.P.