Limba e identidade, chenàbura Bolognesi in Iscanu

Chenàbura su 30, in Iscanu, Roberto Bolognesi at a presentare su libru suo “Le identità linguistiche dei sardi”, publicadu deghe annos a como dae Condaghes. «In una comunidade multilìngue, che a sa sarda, s’impreu de una o de un’àtera limba a disponimentu - leghimus - non dipendet dae sa casualidade, ma est resurtu de unu sèberu chi no est pro fortza cussente. Adotende una limba adotamus finamentas s’identidade linguìstica e unu ruolu sotziale a issa – de una manera o de s’àtera – cullegada». In pare cun s’autore at a presentare su libru Antoni Nàtziu Garau, giornalista, tradutore e intèrprete. Bolognesi, laureadu in Amsterdam in Limba e literadura italiana, su 1993 at conduidu una chirca in contu de fonologia meridionale sarda; chimbe annos a pustis s’at pigadu su PhD. A pustis de àere fatu su chircadore in Amsterdam, semper in Olanda at imparadu – como est in pensione – lu latinu a sos litzeales de cue. Bolognesi punnat a una Lsc prus comuna; sos annos colados at presentadu unos cantos emendamentos pro la megiorare. S’apuntamentu de Iscanu est a sas 5.30 de merie in pratza de Cabras.