'Savoia zenia de porcos'. Processu a s'indipendentista chi iat arrespustu a is frasis ratzistas de Vittorio Emanuele: 'Is sardus? Funt cabras. Pudexint'

(IlMinuto) – Casteddu, 29 de su mes''e cabudanni - "Savoia zenia de porcos". Cras a mangianu su cordinadori natzionali de Sardigna Natzioni Indipedentzia, Bustianu Cumpostu, ant a andai a fac''e su Tribbunali de Casteddu po ai scritu custa frasi - chi de sa varianti vitzesa de su sardu in italianu si tradusit "Savoia come i maiali" - asuta de su pedutzu de su monumentu a Carlo felice de pratza Jenne.

Fueddus scritus cun su spray in tinta arrubiu su 21 de su mes''e làmpadas de su 2006, comenti arrespusta a is giudítzius pagu bellus espressaus in is cunfrontus de is sardus ("Funt cabras", "pudescint e bastat") naus in s'istadi de s'annu primu de su "principi" Vittorio Emanuele de Savoia, pagu satisfau de un'agiustu fattu a sa barca sua candu furiat in bagantza In Sardigna.

"Cumpostu - si podit ligiri in sa nota fatta connosci de Sni - iat a su tempus suu presentau recursu a su decretu penali chi d''iat cundennau a 10 diris de presoni cunvertias in 400 eurus de multa po su fattu ca cunsiderat pagu morali su depi pagai una multa po ai difendiu su pópulu suu de un'aggràbiu chi no si meritat e dimandàt de scontai in presoni sa cundenna bófia a sa marolla de sa giustítzia de unu stadu chi at furau sa soverania sarda".

Su processu at essi acumpangiau, de is 9.00 de unu sit in de protesta e de solidariedadi a fac''e su Tribbunali. A fac''e su giugi su cordinadori de Sni s'at a espresai scéti in língua sarda.

"Si puru connoscendi sa língua italiana - acrarat Cumpostu - unus cantu concetus e motivatzionis s'espressant beni scéti in sardu, est a nai ca su sensu no est su própriu in língua italiana e medas cosas aici s'ant a podi impitai contra de mimmi".

A su leader indipendentista est arribbada puru sa solidariedadi de aMpI.

"A Manca pro s’Indipendentzia - si ligit in d'una nota de su Diretivu políticu natzionali - est in totu e po totu solidari cun Vumpostu. Primu de totu poita no riconnoscit su diritu de nesciunu Tribbunali o giugi italianu de processai e giudicai a nescinu sardu poita is processus funt fattus in língua italiana e in nòmini de unu pópulu (mellus de unu Stadu) chi no est su nostru".

"Fintzas a candu su Stadu italianu - afirmat s'organizatzioni indipendentista de sinistra - at esercitai sa própriu mabesa a is dannus de su pópulu nostru is processus fattus in is tribbunalis italianus ant essi processus de gherra e no scéti processus políticus comenti po s'acuntéssia de Bustianu Cumpostu".

Ligi puru s'rtículu de s'Espresso "Vittorio Emanuele, insulti ai sardi".