Dae "Gambero Rosso" duas furchetas a 16 ristorantes de Sardigna

Noe cunfirmas e sete intradas noas
1 Onniasantu 2022
in sa mesa

In sa Mesa - Resèssida manna pro su mundu de sa ristoratzione sarda. A pustis de sos ristorantes premiados dae sa ghia "Slow Food" essit peri sa classìfica firmada "Gambero Rosso". Dae sa domo editora italiana s'ìsula leat su reconnoschimentu màssimu pro 16 ristorantes. Est a nàrrere ca sunt 16 sos ristorantes de Sardigna chi batint a domo duas furchetas: noe cunfirmas e sete intradas noas.

Si cunfirmat tra sos nùmenes mègius de Sardigna in sa ristoratzione su ristorante "Dal Corsaro" de Casteddu. Semper in sa primu tzitade de s'ìsula, cun duas furchetas agatamus finas su ristorante "Luigi Pomata", su ristorante "I Sarti del Gusto" e su ristorante "Is Femminas di Maria Carta", chi conchistat finas su prèmiu ispetziale “calidade-prètziu”.

Abarrant firmos in su podiu issoro su ristorante de Carluforte "Da Nicolò", su ristorante "Hub" de Macumere, su ristorante "Il Fuoco Sacro del Petra Segreta" de San Pantaleo, su ristorante "Musciora" de s'Alighera e su ristorante "Somu" de Baja Sardinia.

Paris cun sas cunfirmas, tocat a lu pretzisare, bi sunt finas sete intradas noas, est a nàrrere: su ristorante "Il Mattacchione" de Terranoa, su ristorante "Mema" de Pula, su ristorante "Fradis Minoris" de Pula, su ristorante "Trigu" de Tàtari, su ristorante "Chiaroscuro" de Marina Ravarotto in Casteddu e, semper in Casteddu, su ristorante "Josto". Galu, tra sas intradas noas agatamus finas "Sa Cardiga e su Schironi" de Cabuderra.

No est acabbada. Primorosu peri su resurtadu de su "bistrot" casteddaju "Cucina.eat", chi batit a domo tres "cocotte", e finas su de sa tratoria "Armidda" de Abbasanta de Roberto Serra, chi pro sa de tres bias consecutivas est tra sas mègius tratorias de Itàlia. No est totu, pro ite "Armidda" est peri sa primu tratoria de Sardigna. Sos espertos chi ant traballadu a sa ghia, difatis, l'ant premiadu cun su reconnoschimentu prus artu: sos tres càmbaros. Su "chef" Roberto Serra afestat dae São Paulo in Brasile, in ue paris cun Achille Pinna rapresentat sa Sardigna in sa chida de sa coghina italiana.

Tra sas pitzerias sardas, imbetzes, batint a domo tres ispricos sa pitzeria "Re Mi" de Tàtari, sas pitzerias casteddajas "Frammento" e "Maiori".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg