Nucleari. Sa Sardigna a faci 'e su referendum

Ascurta custa nova



(Chistionis e Opinionis) - Casteddu, 1 de su mez''e marzu - Su 15 de su mes''e maju de su 2011 is sardus ant a bandai a votai po arrespundi a sa dimandha: "Ses contràriu a s'installatzioni in Sardigna de centralis nuclearis e de situs po su depósitu de ferrinas radioativas avantzadas o preesistentis?" Ma poita is eletoris de s'Ísula funt lamaus a espressai s'opinioni insoru asuba de sa preséntzia de is centralis nuclearis e de is depósitus de ferrinas? Poita, in s'atóngiu de su 2009, Sardigna Natzione s'est movia po fai unu cumitau promotori e po arregolli is firmas necessàrias a tzerriai a su referendum consultivu? Cun sa lei 133 de su 6 de su mes''e austu de su 2008 - a 21 annus de is referendum abrogativus chi bullànt a su nucleari in Itàlia apustis de sa destrossa de Chernobyl - su Guvernu de su Stadu italianu at decidiu de torrai agoa e de torrai a pigai su caminu de s'àtomu. Sa lei est stetia sighia in su 2009 de un'acórdiu Itàlia-Francia po su cumprimentu de cuatru centralis in Itàlia. Un'àtera lei, cussa de su 23 de su mes''e argiolas de su 2009, at delegau a su Guvernu po localitzai centralis e depósitus de ferrinas. A oi sa mappa de su nucleari no est ancora bessia: cun d-una senténtzia pubblicada is primus de su 2011 sa Corti costitutzionali at cumandau a su Guvernu de intendi su pensu in matéria - po nudda vinculanti - de is Regionis. Ma sa Sardigna - cun pagu genti, cun d-una terra chi no est sismica e cun 35milla ètarus de territóriu militaritzau - currispundit a su ritratu de "regioni ideali" po su nucleari. S'annu passau unu deputau de su Pdl, Giorgio Stracquadanio, at inditau a s'Ísula comenti su logu giustu po ponni una centrali noa. Totu sa "classi política" de sa Sardigna est a cantu parrit fintzas a oi contrària a su fàbbricu de depósitus e de centralis in Sardigna. Su 23 de su mes''e cabudanni de su 2009 su Consillu regionali at aprovau a s'unanimidadi unu documentu chi espressat un'"arrefudu incondizionau" po su nucleari in s'Ísula. Tra is scientziaus, Margherita Hack, candidada in Sardigna po is europeas de su 2009, narat eja a sa tennica atómica. Po s'astrofisica, 88 annus, is tennicas de oi ant fatu diventai is centralis seguras. De pensu contràriu est Massimo De Santi, físicu nucleari e presidenti de su Cumitau internatzionali educatzioni po sa Paxi. "Su nucleari - at precisau De Santi in d-una cuferéntzia in Casteddu - no resolvit po nudda sa cosa. A su contràriu de cussu chi si si funt nendi, su ciclu de produtzioni de s'energia nucleari, a cumentzai de sa bogadura de s'uràniu, produsit CO2. Is tempus po fabbricai e donai aviu a is impiantus funt longus meda: pagu prus de otu-dex'annus. No podeus garentiri sa seguresa necessària: no s'at a podi agatai mai unu situ seguru. Sa chistioni de su smartimentu de is ferrinas abarrat oberta".

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda